文／羅倩英，高雄美濃客家人，這下戴美濃
腔調：南四縣腔
年三十暗晡食飽夜核，𠊎打開一本放了二十零年个相簿，大人儕圍在𠊎身邊盡歡喜看等逐張相片，講等當時个故事，「你看，該時節你既經學會仰般坐吔，人家都講七坐八爬，正六個月你就坐啊恁正，大家看啊當暢喔。」
𠊎正緊㖸，手馬上指等另一張相片講：「這該揇等𠊎个係麼人？」
「這個係你个外叔公，你出世該年，他在桃園做事，毋小心對鐵梯頂項橫下來，橫死吔。」逐擺講話盡大聲个外阿公細細聲講出，看得出佢盡懷念外叔公。
阿姨講：「叔公對𠊎等正經盡好，逐擺對桃園轉來定著會帶好食同好搞个東西歸來，還會偷偷分𠊎等銀角仔去買零嗒食。」
過後大家你一句𠊎一句，開始懷念該位同𠊎無忒多緣分个外叔公，聽等大人儕講等叔公个好，忽然間𠊎就像變成了望等叔公對桃園歸來个細人仔吔。
今年正讀高中个細表妹接等講：「係大姨丈還在，像這下恁樣過年个時節，定著會駛車仔載𠊎等一哪仔行上行下，買東西食。」佢兩隻目珠直直看等該張三儕人共下翕个相片，裡背有細表妹、𠊎同𠊎過身个阿爸。想毋著該時節正幼稚園个細表妹，還記得十過年前𠊎爸渡全家人同佢共下一哪仔尞个事情！
「該擺天時盡冷，妳緊吵講要食冰，若姨丈同便利商店裡背个冰全部買過一遍，結果你淨食兩口，歸家人一路都要𢯭手食你伸个冰。」正講核話，𠊎同相簿弇起來，心肚裡開始有盡多个感覺，毋知愛恁般講起。
推開生鹵个黃色鐵門，坐在長凳項个外阿公哺等菸像係在該等𠊎等樣仔。「這該屋仔裡背，有人離開，乜有人會入來，最好再過兩年，屋家還會多幾个細人仔。」外阿公轉過頭看等𠊎，講話个聲音比平常更大聲吔。
不管外叔公抑係𠊎爸，佢等一生人个時間盡短，毋過留下來个種種，都分後代子孫盡懷念。一生人要仰般正算成功？𠊎想，係分後代个人留下好个榜樣，就係一生人最大个成功吔。
華語：
年夜飯吃完後，我打開一本放了二十多年的相簿，身旁的長輩們圍繞在我身旁津津樂道著每張照片背後的故事，「你看，那時候你已經學會怎麼坐著了，人家都說七坐八爬，才六個月的你就坐得這麼端正，大家看了真開心哦。」
我看了笑一笑，馬上指著另一張相片說：「這個抱著我的是誰？」
「這是你外叔公，你出生那年時，他在桃園工作，不小心從鐵梯上摔下來，摔死了。」一向說話很大聲的外公淡淡說道，看得出來他很懷念外叔公。
阿姨說：「叔公對我們真的很好，每次從桃園回來一定給我們帶上好吃好玩的，還會給我們零用錢去買零食吃。」
後來大家你一言我一語，開始懷念起那位與我沒有太多緣分的外叔公，聽著長輩們說著叔公的好，剎那間我彷彿變成了那位期待著叔公從桃園回來的小孩子。
今年剛升上高中的小表妹接著說：「要是大姨丈還在的話，像現在這樣的過年，一定會開著車載著我們到處走走，買東西吃。」她雙眼緊盯著那張三個人的合照，照片裡有她、我和我過世的爸爸。想不到當時才幼稚園的小表妹，還記得十多年前我父親帶著全家人和她一起四處遊玩的事情呢！
「那次的天氣很冷，妳一直吵著要吃冰，妳姨丈把便利商店裡的冰都買了一遍，結果妳只吃兩口，整路上全家人都要幫忙吃著妳吃不完的冰呢！」說完話我將相簿闔上，心裡面有很多的感覺，不知如何說起。
推開生鏽的黃色鐵門，坐在長椅上的外公抽著菸像是在等我們似的，「這間屋子裡面，有人離開，也有人會進來，最好再過個兩年，家裡還能多幾個小孩。」外公轉過頭看著我，講話的聲音比平常更大了。
不管是外叔公或是爸爸，他們一生的時間很短，不過留下來的種種，都讓後代子孫滿是懷念。一輩子要如何才算成功？我想，要是能給後代子孫留下好的榜樣，就是一輩子最大的成功了。
歡迎討論或留言給我們: