小琉球推動「琉行杯」 4年減少44萬隻一次性飲料杯
【羅盛滿／新竹竹東海陸腔】屏東小琉球這幾年來个觀光人潮當多，所以佢兜推動「琉行杯」免費租借，4年以來推算減少44萬隻一次性塑膠罐仔抑係飲料杯仔个使用，毋單淨減少碳排放量，也達到當地垃圾減量个目的。
行政院環境保護署摎屏東縣政府環境保護局推動「琉行杯共享行動」，由屏東縣小琉球自然人文生態觀光協會執行，對民國107年到110年，營運4年以來響應个店頭、從29隻位所增加為84隻，今年還較會達到超過100間店頭共下來響應。
屏東縣小琉球自然人文生態觀光協會表示，「琉行杯」今年邁入第5隻年頭，希望做得為小琉球創造永續環保，推出只要在小琉球當地租借使用琉行杯，還過翕相拍下摎琉行杯共下个相片、抑係使用情境相片過後，到「琉行杯」面書粉絲專頁撳讚，還過在活動貼文下頭留言貼上相片，同時標記一儕面書（Facebook）好朋友，就有機會抽着「小琉球旅遊消費券」，做得用在配合个歇宿、交通、水上活動還過餐飲券這兜。
馬來西亞个作曲家江賜良編曲 台灣國樂團演奏南洋風情
做毋得出國也做得聽着熟絡个東南亞民謠音樂，台灣國樂團推出「印象南洋」音樂會，邀請台灣婿郎个馬來西亞作曲家江賜良、摎東南亞民謠改編成國樂編制，用國樂講出靚膩膩个南洋風情。
台灣國樂團發布新聞稿表示，台灣國樂團得着文化部平權計畫支持，續下來會推出各式具有文化特色个國樂演出，分樂迷朋友透過音樂欣賞，感受尊重無共樣文化个意涵摎差異，透過音樂拉近族群之間个文化距離。
台灣國樂團「印象南洋」音樂會演出，會在6月21到22，摎6月24到25來演出，逐場時間40分鐘，地點在台灣戲曲中心小表演廳3201小舞台，歡迎鄉親免費報名參加。
台灣援助捐贈立陶宛食物銀行美金50萬個銀 幫助烏克蘭難民
駐立陶宛代表黃鈞耀今晡日拜訪立陶宛食物銀行Maisto Bankas，代表政府捐助民眾善款美金50萬個銀，來協助這隻組織救濟烏克蘭个難民細孲仔。Maisto Bankas感謝台灣援助。
Maisto Bankas執行長谷列維丘斯（Simonas Gurevičius）表示，規劃摎台灣个善款用在採購食品、對6月到7月中旬分裝成一袋一袋，透過Maisto Bankas个兒童食品專車，分送分在立陶宛个各隻城市、一共差毋多2萬儕个烏克蘭難民細孲仔。
駐立陶宛代表處指出，Maisto Bankas成立到今、已經超過20年，係立陶宛重要慈善組織，乜係立陶宛外交部建議个合作對象，來𢯭手適當運用台灣鄉親个愛心。台灣鄉親捐贈烏克蘭超過美金3000萬銀个善款，其中，Maisto Bankas得着捐贈个係美金50萬個銀。
｜講客廣播電臺－收聽頻率｜
▹宜蘭 FM102.9
▹北北基高屏 FM105.9
▹桃竹 FM105.7
▹苗中彰投 FM101.5
▹雲嘉南 FM104.3
▹花東 FM106.9
｜網路收聽｜
▹講客廣播電臺官網｜https://pse.is/R8RU8
▹講客廣播電臺APP｜
(Android連結：https://reurl.cc/8GWlXd)
(IOS連結：https://reurl.cc/O1pb59 )
歡迎討論或留言給我們: