台灣隊在義大利國際羽毛球比賽頭一擺得着金牌 細妹人雙打選手乜拿着冠軍
【羅盛滿／新竹竹東海陸腔】2022年歐洲羽聯巡迴賽其中一站「2022義大利國際羽球系列賽」在昨晡日進行總決賽。義大利國際挑戰賽從1994年開始舉辦到今，台灣隊之前毋識在賽事當中、有得着金牌个紀錄；這擺台灣隊毋單淨拿着台灣隊歷史上頭一垤金牌，這擺比賽一共得着2垤金牌、1垤銀牌、還過1垤銅牌个好成績。
韓國摎美國射出8枚飛彈 回應北韓試射飛彈翕人
韓聯社報導，南韓合同參謀本部今晡日表示，韓國摎美國朝晨4點45分起勢、陸續向東部海域射出一共8枚地對地陸軍戰術飛彈系統（ATACMS），來回應北韓昨晡日從4隻無共樣位所射出8枚短程彈道飛彈，回應上隻禮拜有美國航空母艦參與个韓美聯合軍事演習。
南韓合同參謀本部表示，韓國摎美國實施聯合地對地飛彈射擊个意思斯係講，就算北韓挑事在幾下隻位所射出飛彈、愛尋人麻煩，南韓也會保持平常狀態摎防備形勢，還過準備好做得黏時精準打擊對方射出飛彈个原點、指揮還過支援勢力个能力摎狀態。南韓軍方強烈譴責北韓頻繁試射飛彈，還過嚴正呼籲北韓黏時停止升高朝鮮半島軍事緊張摎安全威脅个行為。
西半部當晝過後防範局部落大水 東南部愛細義燒風
中央氣象局今晡日表示，愛注意當晝過後、西半部容易出現局部落大水，東半部過晝以後會有局部短暫打風時；另外，東南部所在可能有燒風發生，高溫還係有接近攝氏36度个機會。今晡日鋒面漸漸仔接近台灣，北部所在從下半日開始轉為有無定時局部陣雨抑係雷雨个天時，加上西南風偏強，迎風面个中南部所在摎昨晡日共樣，歸日都有局部短暫陣雨抑係雷雨，愛留意當晝過後西半部所在容易出現局部落大水，另外東半部所在天時較穩定，過晝以後有局部短暫打風時。氣溫方面，暗晡朝晨各地低溫差毋多26、27度，日時頭各地高溫31、32度，另外花蓮縣縱谷還過台東、因為背風沉降關係，高溫還係有接近36度个機會，請鄉親出門愛記得補充水分，啉加兜水，正毋會熱着。
｜講客廣播電臺－收聽頻率｜
▹宜蘭 FM102.9
▹北北基高屏 FM105.9
▹桃竹 FM105.7
▹苗中彰投 FM101.5
▹雲嘉南 FM104.3
▹花東 FM106.9
｜網路收聽｜
▹講客廣播電臺官網｜https://pse.is/R8RU8
▹講客廣播電臺APP｜
(Android連結：https://reurl.cc/8GWlXd)
(IOS連結：https://reurl.cc/O1pb59 )
