委內瑞拉有希望恢復出口石油 國際油價大跌
【羅盛滿／新竹竹東海陸腔】在美國表示續下來會放寬對生產石油國家委內瑞拉政府个限制，還過美國聯邦準備理事會（Fed）主席鮑爾表示聯準會續等會繼續升息，分美國經濟成長放較緩兜仔，來壓制通貨膨脹飆高過後，國際油價今晡日大跌。紐約商品交易所西德州中級原油6月交割價大跌美金1.8個銀，來到一桶美金112.40個銀。倫敦北海布倫特原油7月交割價大跌美金2.31個銀，來到一桶美金111.93個銀。
芬蘭摎瑞典宣布：佢兜兩國在今晡日共下申請加入北大西洋公約組織
土耳其總統艾爾段昨晡日確認土耳其反對芬蘭摎瑞典加入北大西洋公約組織（NATO），還過再次指控兩國並無採取明確个反恐怖主義立場，還過對土耳其實施制裁。芬蘭摎瑞典宣布，佢兜兩國在今晡日共下送出加入北大西洋公約組織个申請表。安德森摎尼尼斯托會在韶早共下拜訪白宮，摎美國總統拜登（Joe Biden）討論兩國加入北大西洋公約組織還過歐洲安全相關事宜。
天時資訊
中央氣象局表示，今晡日東北季風小可減弱，打早中部以北摎東北部低溫係18到20度，南部摎花、東所在係20、21度左右，日時頭起勢各地高溫會比昨晡日再過回升2到3度，桃園以北摎東半部差毋多25、26度，其他所在係27到29度。落水方面，環境漸漸仔轉為偎東風，在迎風面个基隆北海岸、東半部摎恆春半島歸日無定時有局部陣雨，毋過暫停落水个空檔多，另外，恆春半島摎東南部所在暗餔夜過後受到南方雲系影響，落水情形會較明顯，西半部所在大體係多雲做得看着日頭个天時，過晝以後、在山區有局部打風時个機會。氣象局推算，韶早環境轉偏東風，落水以迎風面為主，基隆北海岸、東半部所在摎恆春半島有局部短暫陣雨，其他所在係多雲到好天，當晝過後、南部所在摎其他山區有局部打風時。拜五南方雲系向北片徙，水氣增多，環境轉為無穩定，南部摎東南部所在有短暫陣雨抑係雷雨，其他所在也有局部短暫陣雨。
｜講客廣播電臺－收聽頻率｜
▹宜蘭 FM102.9
▹北北基高屏 FM105.9
▹桃竹 FM105.7
▹苗中彰投 FM101.5
▹雲嘉南 FM104.3
▹花東 FM106.9
｜網路收聽｜
▹講客廣播電臺官網｜https://pse.is/R8RU8
▹講客廣播電臺APP｜
(Android連結：https://reurl.cc/8GWlXd)
(IOS連結：https://reurl.cc/O1pb59 )
