烏克蘭戰事無停　聯合國統計已經超過600萬儕逃難出走

【羅盛滿／新竹竹東海陸腔】聯合國難民署今晡日个數據顯示，俄羅斯對2月24開始侵略烏克蘭之後，已經有超過600萬儕難民逃難離開烏克蘭。截止到5月11，總下有602萬9705儕已經逃難離開烏克蘭。另外，根據聯合國難民署專屬網站，盡多難民到鄰國以後，還會繼續前往其他國家，現下係波蘭接納个難民人數最多。聯合國推算今年可能會有超過800萬儕逃難離開烏克蘭。

日本摎歐盟領袖峰會

日本首相岸田文雄今晡日上晝10點半起勢，摎來訪个歐盟理事會主席米歇爾、還過歐盟執行委員會主席范德賴恩、舉行第28屆日本摎歐盟定期領袖會談。米歇爾摎范德賴恩都感謝日本在俄羅斯侵略烏克蘭這件事情頂項，對俄羅斯實施嚴厲个制裁，還過摎歐洲合作。做為共下分享、還過根據基本價值摎規則个國際秩序个夥伴，日本摎歐洲續等會加強在貿易、氣候、數位、還過有關印太个合作。日本摎歐洲也會在對中國个戰略頂項加強合作，期盼做得幫助着推算在5月下旬舉行个美國摎日本高峰會，還過美國、日本、澳洲、印度「四方安全對話」个高峰會。

天時資訊

中央氣象局指出，今晡日日時頭雨勢會再過增加，全台灣各地摎外島个澎湖、金門、馬祖都有短暫个陣雨抑係雷雨發生，其中中部以北摎東北部所在落水較持續，還過緊夜緊明顯，有局部落大水發生个機率，另外、南部摎花、東所在落水空檔較多。溫度部分，打早各地低溫差毋多23、24度，還過日時頭高溫小可下降，北台灣係25、26度左右，感受舒適，中南部摎花、東係27到31度，無落水个時節還係偏翕熱。氣象局推算，拜六、禮拜滯留鋒面影響，水氣多、大氣無穩定，容易有短延時強落水，西半部摎東北部所在有陣雨抑係雷雨，還過有局部落大水抑係豪雨發生个機率，其他所在也有局部短暫陣雨抑係雷雨。

｜講客廣播電臺－收聽頻率｜

▹宜蘭 FM102.9

▹北北基高屏 FM105.9

▹桃竹 FM105.7

▹苗中彰投 FM101.5

▹雲嘉南 FM104.3

▹花東 FM106.9

｜網路收聽｜

▹講客廣播電臺官網｜https://pse.is/R8RU8

▹講客廣播電臺APP｜

(Android連結：https://reurl.cc/8GWlXd)

(IOS連結：https://reurl.cc/O1pb59 )