三類對象快篩陽性視同確診明日實施
【江芮敏／苗栗市四縣腔】國內COVID-19疫情嚴重，為了增加採檢量能，指揮中心指揮官陳時中今天下晝表示，未來鄉親假使在「3日居家隔離還有4日自主防疫」抑係「7日居家檢疫」个時節，使用家用抗原快篩試劑進行快篩結果係陽性，做得照5大步驟進行通報。首先係透過遠距離抑係視訊看診，由醫師協助評估確定快篩結果，第二確認係鄉親還有醫師對評估陽性結果係毋係有達到共識，假使有共識，將健保卡上傳陽性結果還有通報至系統，再來，鄉親在屋下等待地方衛生局聯絡，最尾，地方衛生局照規定安排到指定位所隔離還過開隔離通知書；係講鄉親同醫師對陽性結果無共識，續下來會通知地方衛生局安排PCR來做採檢。
央行：地緣政治緊張等四大風險 全球高通膨現象恐更持久
通貨膨脹持續提高，變做國內外共樣堵著个問題，中央銀行示警，國際形勢緊張、國際原物料價格起高、變種病毒造成疫情，還有氣候變化過較嚴重，因為這四大風險，全球通貨膨脹个情況可能還毋會結束。中央銀行表示，以上原因都會衝擊全球經濟活動同擴大金融市場變化，增加全球經濟个風險。
天時資訊
中央氣象局表示，天光日臺灣中部以北同東北部地區有落風時水个機會，其他所在同澎湖、金門、馬祖共樣有落水个機會，過晝以後各地山項也有部分所在落大雨个機會，天光暗晡中部以北同東北部也有部分所在落大雨个情形。今晡日還有天光日兩日暗晡到打早金門、馬祖容易有部分所在啟濛煙抑係出現低雲影響能見度，請鄉親多加注意。
｜講客廣播電臺－收聽頻率｜
▹宜蘭 FM102.9
▹北北基高屏 FM105.9
▹桃竹 FM105.7
▹苗中彰投 FM101.5
▹雲嘉南 FM104.3
▹花東 FM106.9
｜網路收聽｜
▹講客廣播電臺官網｜https://pse.is/R8RU8
▹講客廣播電臺APP｜
(Android連結：https://reurl.cc/8GWlXd)
(IOS連結：https://reurl.cc/O1pb59 )
