台灣半導體牽動全球 米國國務卿承諾幫助台灣自我防衛對抗中國
【羅盛滿／新竹竹東海陸腔】米國國務卿布林肯昨晡日出席國會聽證會，面對議員關切台灣身為半導體生產个重要性，布林肯回應表示，米國政府有感受到這隻議題个急迫性，正透過幾下種方式因應。在半導體方面，摎中國比較之下，米國在高端半導體摎晶片生產項、占有顯明優勢，目前連同台灣、日本摎荷蘭這兜關鍵國家採取重要步驟，布林肯講，米國會堅決確保台灣擁有自我防衛所需要个一切工具，做得抵抗潛在侵略，包括假使中國單方面破壞維持幾下十年个現狀。有米國議員表示，戰爭期間愛支援海島國家會還較難加當多，所以米國援助以前就愛送達。佢也呼籲米國政府加速處理現有个對台灣軍售案，分台灣還較遽拿着武器，也應該協助台灣得着軍事對抗个能力。
6歲到11歲个細孲仔最遽在5月初2注預防射 注忒過後2隻禮拜之內減少激烈活動
教育部在昨晡日表示，6歲到11歲个細孲仔注COVID-19預防射，最遽在5月初2起勢、斯做得安排在校園肚注射，請學校分家長至少7日个思考時間。在注預防射當日，教育部也請學校調整課程內容，安排靜態活動，觀察學生仔个身體狀況，還過在注忒預防射過後、兩隻禮拜之內減少激烈活動；細孲仔注忒預防射過後、假使有不良反應，做得請3日疫苗假。中央流行疫情指揮中心指揮官陳時中講，兒童莫德納預防射个數量還罅，輝瑞BNT預防射兒童劑型也定著會有，但係預防射到貨時間、還愛等待進一步確定。
天時資訊
中央氣象局指出，今晡日天時當好又熱，當晝左右、台南市、高雄市、屏東縣偎山區、抑係窩壢有出現36度高溫个機率。北部有局部短暫陣雨，應當注意東半部天時較無穩定，有局部短暫陣雨抑係雷雨，尤其下半日過後、花東所在會有局部較大雨勢發生个機率，另外，中南部還係好天到多雲為主，但係當晝過後、山區可能有局部短暫陣雨。氣象局預估，韶早拜四打早北部摎東北部還係有兜清冷，日時頭起勢到拜五、東北風小可減弱，北部摎東北部氣溫小可回升；因為水氣減少，各地大體係多雲到好天。
｜講客廣播電臺－收聽頻率｜
▹宜蘭 FM102.9
▹北北基高屏 FM105.9
▹桃竹 FM105.7
▹苗中彰投 FM101.5
▹雲嘉南 FM104.3
▹花東 FM106.9
｜網路收聽｜
▹講客廣播電臺官網｜https://pse.is/R8RU8
▹講客廣播電臺APP｜
(Android連結：https://reurl.cc/8GWlXd)
(IOS連結：https://reurl.cc/O1pb59 )
