尋轉池上魚米之鄉美名 大坡陂塘放養3千尾原生種魚仔
【羅盛滿／新竹竹東海陸腔】尋轉池上魚米之鄉美名，台東池上鄉公所摎花蓮縣水產培育所共下合作，會在大坡陂塘放3,000尾稻花魚（菊池氏細鯽）摎牛屎鯽（高體鰟鮍）个魚崽仔，期盼打造出大坡陂塘原生魚類个復育區摎種源庫。
池上鄉公所今晡日發布訊息表示，早年因為大坡陂塘魚產豐盛、使得池上分大自家安做魚米之鄉，該量時只要池上鄉親个飯桌頂有米、有魚，斯分人試着係豐湧个象徵。大自家講个「魚米之鄉」除了全國有名个池上米之外，魚就係大坡陂塘水產之一个稻花魚。
為着分大坡陂塘生態復育還較有效率，摎花蓮縣水產培育所合作，4月29這隻禮拜五下晝頭在大坡陂塘生態教育區舉辦魚崽仔放養活動，水產培育所提供3,000尾原生魚種个稻花魚摎牛屎鯽進行放養，邀請鄉親共下支持復育工作。
池上鄉長張堯城表示，這站仔會完成3座人工島个移除、恢復大坡陂塘原有水域面積，還過復育羊角仔（菱角）田營造羊角鳥（水雉）个樂園；期盼放養原生種魚類、做得分大坡陂塘魚仔摎蝦公、滿哪仔都看得着个風光再現，尋轉池上魚米之鄉个好名聲。
台中科大、明道中學合作 開發手語燒幫助聽障者
為着培養聽障者創業自立能力，國立台中科技大學商業設計系結合明道中學餐飲科，用在地農特產品研發「手語燒」雞卵糕，希望大自家做得享用美食个時節，做得接觸摎認識手語。
台中科大商業設計系表示，這擺當歡喜做得摎聾人協會合作，明道中學為這隻專題開發4種台中專屬个口味，會授權分聾人協會做後續販售，未來在市面上斯做得食着這擺開發出無共樣口味「手語燒」雞卵糕，也做得看着當有趣味个手語燒造型。
｜講客廣播電臺－收聽頻率｜
▹宜蘭 FM102.9
▹北北基高屏 FM105.9
▹桃竹 FM105.7
▹苗中彰投 FM101.5
▹雲嘉南 FM104.3
▹花東 FM106.9
｜網路收聽｜
▹講客廣播電臺官網｜https://pse.is/R8RU8
▹講客廣播電臺APP｜
(Android連結：https://reurl.cc/8GWlXd)
(IOS連結：https://reurl.cc/O1pb59 )
