文／黃碧清 課後輔導員、苗栗銅鑼客人，現下戴苗栗市
腔頭：北四縣腔
前駁仔姊妹儕共下打鬥敘談哆，叔伯老弟講「吾山項該間屋整理到好勢又舒適，喜歡去山項遶尞个人做得歇。用『以工換宿』方式，去歇个人愛扌帣手拔草仔淋菜、掃打伶俐，恁呢就做得。」這句「以工換宿」，分亻厓愐起老頭擺个「換工」，該溫馨又燒暖个生活故事。
細時節歇山頂高，禾田像梯排一坵層過一坵，遠遠看親像石碫仔。山仔像石壁恁竳，種種揫香絲仔、香茅草、仙草。頭擺無機械，山路又細又嶇，割禾蒔田、燒火碳、焗香茅油…全愛人工。屋家人有讀書个、在地泥項爬捻雞屎食个、還有擎杖仔个老人家，三除四扣伸無一隻手巴掌，愛請人做事又無錢，仰結煞？
人就愛曉得變竅，耕種人个頭腦真湛斗，想出用人工換人工个方式。今晡日吾屋家緊工，鄰舍儕來扌帣手，下二日換佢兜緊工，吾屋家就愛派一儕人去做還人，這就係「換工」。換工，毋使撿工錢，係一工換一工，男婦老嫩粗幼事無議無論。還過，農業社會該央時，耕田耕圃下下愛用著牛仔，人無閒用牛仔來乜算一工。牛仔對耕種人來講像家產恁寶貴，無牛仔就像少忒手樣仔無方便。故所，老一輩有耕種个人大體無食牛肉，因爭對牛仔个感情就像屋家人，仰會盼得㓾牛仔食牛肉？
頭擺還有一个同「換工」共樣恁靚个景緻—「扌帣手」，「扌帣手」摎「換工」有兜仔爭差係：換工愛做還人，扌帣手就毋使。鄰舍有好歪事做光景，大家就當落力放下手項事頭來「扌帣手」。擎桌凳借盤碗、舂粢打粄挼粄圓，㓾雞捋鴨煮食打托盤，項項就大家共下來。可惜个係，因爭社會變遷工業腳步遽過耕種，大家上班無閒直掣各食各做，有錢麼个就有專門个貌頭，故所，人情味緒緊來緊淡忒了，這下愛看著這團結又鬧熱个場面斯已難了。
「換工」摎「扌帣手」就共樣，係隔壁鄰舍互相幫襯，扌帣來扌帣去無計較，有淰淰个關心乜有重鈂鈂个情義。這醹到化毋開个人情味，毋係用金錢來計算，乜無法度用秤仔來秤重，係像摎親人之間个信用，有錢乜買毋著。換工同扌帣手就係，佢牽起隔壁鄰舍个感情，大家手牽手箍起歸庄个心，恁靚个文化傳承，望得再尋轉來。
華語：
換工
前陣子兄弟姊妹們一起聚餐聊天，堂弟說「我山上那間房子整理的樸實好用，喜歡去山上遊玩的人可以住。用『以工換宿』方式，去住的人要幫忙拔草澆菜、清掃，這樣就可以。」這句「以工換宿」，讓我想起以前的「換工」，那溫馨又溫暖的生活故事。
小時候居住在山上，稻田像樓梯一坵疊過一坵，遠遠看就像石階。山排像石壁陡峭，種滿相思樹、香茅草、仙草。以前沒有機械，山路又小又陡，割稻插秧、燒木碳、焗香茅油…完全靠人工。家人有讀書的、在地上爬撿雞屎吃的、還有拄拐杖的老人家，三除四扣剩不到一隻手掌，要請人做事又沒錢，怎麼辦？
人就要知曉變通，耕種人的頭腦真棒，想出用人工換人工的方式。今天我家農忙，隔壁鄰居們來幫忙，改天換他們農忙，我家就要派一個人去做還人，這就是「換工」。換工，不需要付工錢，是一工換一工，男女老幼粗細活都一樣。還有，農業社會那時候，耕田耕園全部都要用到牛，人沒空用牛隻來也算一工。牛對耕種人來講像家產般寶貴，沒有牛隻就像少了手一樣不方便。所以，老一輩有耕種的人大部分不吃牛肉，因為對牛的感情就像家人，怎麼捨得殺牛吃牛肉？
以前還有一個和「換工」一樣美麗的風景—「幫忙」，「幫忙」和「換工」有些不一樣的是：換工要還，幫忙就不用。隔壁鄰居有婚喪喜慶，大家都盡力放下手上事情來「幫忙」。搬桌椅借碗盤、搗麻糬搓湯圓，殺雞鴨煮食端托盤，樣樣都大家一起來。可惜的是，因為社會變遷工業腳步快過耕種，大家上班各自忙碌，只要有錢什麼事就有專人承包，所以，人情味越來越淡，現在要看到這團結又熱鬧的場面，難了。
「換工」和「幫忙」都一樣，是隔壁鄰居互相幫忙，幫來幫去不計較，有滿滿的關心也有沉甸甸的情義。這濃到化不開的人情味，不是用金錢來計算，也無法用秤子來秤重，是宛如親人之間的信用，有錢也買不到。換工和幫忙都是，他牽起隔壁鄰居的感情，大家手牽手圍起一庄的心，這麼美的文化傳承，期待再尋回。
